14
март
2019
Бексұлтан Нұржекеевпен кездесу
13.03.2019 жылы білім ордамызда Халықаралық Алаш сыйлығының лауреаты, Мемлекеттік сыйлықтың иегері Бексұлтан Нұржекеевпен кездесу болып өтті. "Адам туғанда «жазушы болам» деп тумайды, әуелі адам болып өмір сүреді. Кейін бейімделіп, талантына қарай жетіліп, өзін-өзі шыңдаса бәріне қол жеткізуге болады. Енді біздің маңдайымызға жазушылық өнері бұйырған екен. Сезіммен жүріп, түрлі шығармаларды дүниеге әкелуге, қоғамға аз да болса, үлес қосуға тырысамыз. Кейде бір нәрселерді өзгерткіміз келеді, сосын шабыттана отырып жазамыз», – деп бастап, кеңінен көсілді. Оқушыларды өзінің ұлт-азаттық көтеріліске арналған «Әй, дүние-ай» шығармасымен және тағы басқа жаңа кітаптарымен таныстырды. Оқушылар тарапынан қойылған түрлі сауалдар жазушы шығармашылығының басым бөлігі болған махаббат тақырыбы, «қазақ арасындағы жікшілдік», «бүгінгі жастарға деген көзқарасы», «жер-су аттарын аудару мәселесі», «қазақ аруының рөлі» сынды мәні зор мазмұнды сұрақтарға тұщымды жауап алынды. Сондай-ақ, суреткер Нұржекеев жастық шағы мен алғашқы махаббаты туралы, ақиық ақын Мұқағали Мақатаевпен ұмытылмас кездесуі жайлы, алғашқы шығармасының жарыққа шығуындағы келеңсіз оқиғалар хақында да айтып өтті. Кеш соңында білім ордасына арнайы атбасын бұрып келген жазушы Б. Нұржекеевке сый-сияпат тарту етілді.